إزاي تنظم وقتك باستخدام الطماطم؟؟

تقنية الطماطم وتنظيـم الوقت!

أيوا الطماطم، ممكن يكون العنوان غريب حبتين، لكن ممكن بعد ما نكمل قراية نعرف إيه المقصود بتقنية الطمـاطم أو The Pomodoro Technique؟؟

كلنا دايما بنبقى في صراع مع الوقت عشان ننجز المهام المطلوبة مننا، وأعتقد إنه مفيش فئة أكتر من الطلبة بتعاني من الصراع دا J

يعني بيبقى مطلوب مثلا من الطالب إنه يخلص منهج ما اتفتحش من أول الترم ليلة الامتحان (طبعا دي مش دعوة للكسل، أديني قلت أهه J )..

المهم إنه بيبقى وراه مهمة لازم ينجزها في وقت قياسي..

حاجة تانية تفرق الشخص الناجح عن غيره، إنه دايما بيبقى عنده مهارة في تنظيم وقته وإنجاز مهامه في الوقت المناسب، بخلاف الشخص الغير ناجح، اللي غالبا بيبقى عنده طوارئ دايما ويفاجئ بكم هائل من المهام اللي مطلوب منه إنه ينجزها برده في وقت قياسي..

عشان كدا في مستشار إيطالي اسمه (فرنسيسكو سيروللو) – مستشار في مجال الأعمال – طلع لنا بفكرة جميلة وهي تقنية الطماطم 

يا ترى ليه  سمى التقنية دي بالاسم دا؟

التقنية دي معناها باختصار إنك تستعمل عداد المطبخ (الـ counter) اللي غالبا بيبقى شكله على شكل الطماطم (طبعا لو حد سألني هل شفت عداد زي كدا قبل كدا هقول لاء J ) في إنجاز مهامك..

إزاي؟؟ في 4 خطوات:

(1)          اختار المهمة اللي عايز تنجزها في وقت قليل.

(2)          اظبط العداد الـ(Pomodoro) على فترة زمنية معقولة تقدر فيها تنجز مهمتك.

(3)          طبعا تبدأ مهمتك وتركز فيها جدا من غير أي مقاطعة.

(4)          أول لما العداد ينهي الفترة الزمنية اللي ظبطوا عليها، دا معناه إنك المفروض تكون أنجزت مهمتك.

فائدة التقنية دي:

بتخليك تركز أكتر في الشغل اللي في إيدك عشان تخلصه في  وقت قياسي، لأن ببساطة لما الواحد يكون حاسس إنه قدامه وقت كبير، مش بينجز المطلوب منه، لكن لما الوقت دا بيبقى Limited بيبقى مجبر إنه ينجز علطول..

ملحوظة هــامة جدا جدا جدا :

في ناس كتير – وأنا واحدة منهم – ممكن مقدرش أقعد على كتاب بذاكره أو أي حاجة مطلوب مني أكتبها زي Report أو Sheet هسلمه أكتر من 30 دقيقة، هل ده معناه إني لو كنت ظابطة الـ Pomodoro على ساعة مثلا واحتجت إني أخد Rest يبقى أنا كدا بضيع وقت؟؟!!

أكيد لاء، تقنية الـ Pomodoro ما أغفلتش الجانب دا، يعني مثلا:

ممكن تظبط العداد على 25 دقيقة تنجز فيهم جزء من المهمـة

أول ما يرن العداد، تعرف أن دا وقت تاخد فيه Rest، مثلا لمدة 5 دقايق (حلوين أوي J )..

بعدين تبدأ عدة جديدة أو بومودورا جديدة، وهكذا..

تدريجيا وبعد الاعتياد على التكنيك دا هتلاقي نفسك من نفسك بتنجز أي حاجة في إيدك في وقت قياسي، وتزيد من مستوى تركيزك.. J

طبعا أول سؤال يتبادر للذهن: منين نجيب البومودورا دي؟

مش محتاجة بومودورا ولا يحزنون، أغلب الموبايلات وأجهزة اللاب توب دلوقتي بقى فيها Counter أو Timer يغنيك عن استخدام البومودورا..

وحتى لو مش في موبايلك أو اللاب توب بتاعك الحاجات دي ممكن ببساطة شديدة تستخدم ساعة منبه تقدر تظبطها على وقت معين من الدقايق، وترن عند انتهاء المدة المحددة J

التكنيك دا بيفيد الطلبة جدا.. واسأل مجرب.. 

كتبته بالاستفادة من مقال لـ عصام بلهاشمي من مدونة عالم الإبداع